Andecha Astur denuncia la conivencia ente la Conseyería Cultura y l’Ayuntamientu Xixón


NOTA DE PRENSA

Denuncia que la ZALIA va suponer la destrucción del valiosu padremuñu etnográficu
y arqueolóxicu d’esta collación xixonesa.
Nun ye denguna novedá el desenfotu de la Conseyería Cultura haza’l Padremuñu asturianu
y nel casu de San Andrés de los Tacones, amiéstase amás el despreciu del Ayuuntamientu
Xixón pol nuesu padremuñu.
Andecha Astur vien faciendo un seguimientu de la esapaición de varies paneres, dos d’elles
de 1805, y horros a istancies de l’Asociación de Vecinos de San Andrés que punxo en
conocencia de la nuesa muerganización política la so sospechosa esapaición de la nueche a
la mañana.
Yá nel mes de setiembre del añu pasáu, y tres dos meses de silenciu de la Conseyería Cultura
al escritu de denuncia de los vecinos, Andecha Astur interesóse directamente pol tema
obteniendo rempuestes evasives por parte los téunicos de Padremuñu de dicha Conseyería,
que manifestaron desconocer el paraeru de les paneres y ensiquiera si fueren destruyíes o
treslladaes. Simplemente taben a la espera d’una rempuesta del Ayuntamientu Xixón sobro’l
so paraeru. Pel so llau, esti actuó igual que la Conseyería incumpliendo la Llei de Padremuñu.
Y ye que nel casu les paneres y horros de San Andrés hai una conivencia nidia ente
l’Ayuntamientu Xixón y el Gobiernu del «Principado», darréu que dambos formen parte de
la sociedá ZALIA S.A. (xunta’l Puertu Xixón y Puertu y Ayuntamientu d’Avilés), que
pretende desendolcar la Zona d’actividaes Lloxístiques nesta collación xixonesa evidentemente a costa de la esapaición del so padremuñu etnográficu (horros, paneres y caseríes de más de100 años) y arqueolóxicu.
Nesti postrer aspeutu hai de destacar la esistencia d’un castru en San Andrés, conocíu comu
El Cuetu, catalogáu pol hestoriaor J. Manuel González nos años 60, que podríe, sigún los
arqueólogos, tar en rellación col cercanu castru d’El Castiellu, nel Monte Areo, asina comu
coles cercanes villes romanes de Veranes y Beloñu y el Camín Rial de Tremañes.
Nel casu d’horros y paneres hai más d’una decena con una antigüedá superior a los 100
años, recoyíos nel Catálogu Urbanísticu de Xixón, que podríen correr la mesma suerte que
los denunciaos, darréu que ye incompatible la conservación d’esti padremuñu col desendolque
de la ZALIA.
Esti ye ún de los motivos nos qu’Andecha Astur vien fundamentando la so firme oposición
a la ZALIA dende’l so entamu.
A xuiciu d’Andecha Astur les entrugues que tienen plantegaes agora la Conseyería Cultura
y l’Ayuntamienu Xixón son ¿Qué piensen facer pa que nun esapaezan los horros y paneres
de San Andrés qu’entá queden en pie? ¿Cómu piensen conservar el castru d’El Cuetu?
¿Piensen sacrificar el Padremuñu Cultural de San Andrés que ye de tolos asturianos pa
costruyir la ZALIA?.
Carme Pérez Antolín
Andecha Astur de Xixón