Darréu cellebró l'homenaxe a les víctimes del fascismu en Friere


Nota de prensa de Darréu
La organización de mocedá d'izquierda soberanista Darréu cellebró esti pasáu sábadu 28 de setiembre un homenaxe a les víctimes del facismu d'ayeri y güei nel pueblu llangreanu de Frieres. La organización xuvenil
fixo alcordanza de les víctimes d'esta llocalidá, repasó la so hestoria y la so evolución y espresó que'l facismu ye la ferramienta qu'emplega la burguesía p'aparar la llucha popular en pro de superar el sistema capitalista y algamar la democracia.

Per otru llau, nel actu confluyeron representantes del sindicatu Corriente Sindical d'Izquierda y de les organizaciones polítiques Andecha Astur y Conceyu Abiertu. Dellos representantes intervinieron, felicitando a la organización Darréu por entamar esti actu y falando sobre'l peligru del facismu y cuestionando l'actual Réxime español, concluyendo que'l mesmu ye resultáu d'una riestra de reformes empobinaes y permitíes pol franquismu más reaccionariu.
Dellos vecinos del pueblu de Frieres tuvieron presentes nel actu y hebo una intervención d'una vecina, que felicitó a Darréu pol homenaxe y llamó a la mocedá asturiano a nun escaecer estos fechos. L'actu finó cola interpretación del himnu "La Flor del Agua" y la colocación nel monolitu d'alcordanza a les víctimes del franquismu de Frieres y Los Sotos d'una asturina floral.