Oficina de "empleo" en Xixón -Foto Asturias Verde- Andecha Astur considera que estos nuevos datos, que cuasi que dublen la media estatal, ponen n'evidencia al “Principado”, y alcen al candidatu del PSOE a la categoría de farsante tres les sos recién declaraciones.
Nota de prensa de Andecha Astur
Andecha Astur considera que los nueos datos de paru d'esti mes confirmen les repitíes denuncies que llevamos rializando nel sen de que la situación sociu-económica a la que les polítiques d l'Estáu español llevaron a Asturies, ye cuantitativa y cualitativamente munchu pior que la propia del Estáu español.
La medría del paru nun 5,92% (doblando práuticamente'l 3,2% de media estatal, el 3% si se xebren los datos asturianos), y un númberu de paraos de 86.008 presones, xuntu coles escandaloses cifres de población obligao a emigrar (alredior de los 20.000 añales) dibuxen un panorama dantescu, nel que'l nivel de sufrimientu social ye difícilmente ancultable magar tola hipocresía de la que faen gala los partíos del “Principado”, especialmente los del gobiernu “PSOE-IU”, empeñaos n'amazcarar una realidá de la que son cómplices y responsables.
Nesti sen estos llamentables datos ponen nuevamente n'evidencia al “Principado”, y alcen a la categoría de farsante al candidatu del PSOE nestes eleiciones, Javier Fernández, cuandu apocayá declaraba que con ellos diben faer d’Asturies un llugar onde allegar a trabayar en cuentes del país d'emigrantes y paraos nel que mos convertieron les sos polítiques d'humildación y sumisión a los intereses de Madrid. A la fin, Andecha Astur fai un llamamientu al conxuntu de la sociedá asturiana a defender ca puestu trabayu ún a ún y a responder activamente frente a estes polítiques de destruición del nuesu texíu económicu y productivu que nun tienen otra fin que l’esaniciu del nuesu futuru como Pueblu.
+ MÁS Información
Comentarios
Publicar un comentario