Andecha acusa al gobiernu municipal de Xixón de favorecer los intereses d’especulaores y costructores

Andecha Astur desixe la paralización darréu del PGOU
Énte’l varapalu xudicial que vien de recibir el gobiernu municipal del PSOE-IU y les declaraciones de responsables del conceyu anunciando la so intención de recurrir al Supremu y continuar colos sos planes urbanísticos, Andecha Astur desixe la paralización darréu del PGOU, acusando a dichu gobiernu de conceyu de dir a la gueta namás ganar tiempu y enfrentamos a una política de fechos consumaos, continuando coles sos agresiones urbanístiques en Cabueñes, Castiello, Granda, Porceyo, etc, cola única fin de caltener contentos a especuladores y costructores baxo cuyes presiones vien actuando l’Ayuntamientu Xixón.
Asina mesmo, Andecha Astur considera que son igual d’illegales los planes especiales comu’l de Roces o la ZALIA, que queden fuera de les consecuencies d’esta sentencia por mor de la perversión utilizada pol Ayuntamientu al sacalos del PGOU comu planes independientes pero, a la fin y a la postre con idéntiques consecuencies pa la fastera rual y el mediu ambiente de tolos xixoneses.
Per otru llau, Andecha Astur valora esta sentencia del TSJA comu un trunfu de los vecinos de la fastera rural de Xixón y de los que, sofitándolos nes tres sucesives marches verdes, manifestémosmos demientres los cincu años caberos escontra’l PGOU de Xixón. N’efeutu, dichu plan ellaboráu y tramitáu a espalde y escontra los intereses de los vecinos de Xixón, namás contenta a los especuladores y costructores que, en plen fiebre’l lladriellu, vieron nesta corporación un fiel aliáu pa los sos planes.
A los casos de corrución urbanístico qu’afeuten direuta ya indireutamente a estes y anteriores corporaciones del POSE ya IU hai d’amestar agora esti varapalu xudicial -otru más, comu’l depuraora de la Fastera Este- que dexa bien a les clares la illegalidá de la tramitación ensin evaluación medioambiental y saltándose, comu vien siendo marca de la casa, los procedimientos alministrativos.
Andecha Astur considera esta sentencia exemplar del TSXA qu’anula’l PGOU de Xixón un pasu importante pa poner cotu al urbanismo desaforáu y avasallaor n’Asturies; y un precedente, xunto cola anulación del PGOU de Llanes, cola que conseguimos paralizar en parte la urbanización xabaz de la costa d’esti conceyu que taba en plenu procesu de «marbellización».